Íslendingar með besta sóknarliðið á HM

Dönsku landsliðsmennirnir í handknattleik sem rætt er við í dönskum fjölmiðlum í dag viðurkenna að heppnin hafi verið á bandi Dana í leiknum gegn Íslendingum í gær. Þá er Íslendingum hrósað fyrir baráttu sína og segir Kasper Hvidt, markvörður Dana, í samtali við Poitiken að Íslendingar spili besta sóknarleikinn á HM.

Ljóst er að spennan í leiknum í gær hefur haft sín áhrif á Dani því á vef Jótlandspóstsins er Dönum vísað inn á heimasíðu sálfræðingafélags Danmerkur þar sem bent er á krækjuna „áfallahjálp" og lesa þar sem þar stendur. „Þá ert þú reiðubúin(n) til að fylgja danska liðinu áfram á HM," segir í grein Jótlandspóstsins.

Þá er haft eftir Lars Rasmussen, hornamanni Dana, að hann sé búinn að fá nóg af spennandi leikjum eins og þessum, héðan í frá verði Danir að vinna leikina með meiri mun svo hann geti slakað betur á.

Þá er haft eftir þeim Jesper Jensen og Lars Möller Madsen, risanum sem skoraði sigurmark Dana, að þeir hafi óteljandi sinnum notað það leikkerfi sem lagt var upp með í sigurmarkinu. Þeir eru nefnilega félagar í danska liðinu Skjern, sem Aron Kristjánsson þjálfar.