Óskemmtileg lífsreynsla, segir eigandi Litlu Kaffistofunnar

"Það er óhætt að segja að þetta hafi verið óskemmtileg lífsreynsla," segir Stefán Þormar Guðmundsson eigandi Litlu kaffistofunnar. Par vopnað hnífi og hafnarboltakylfu reyndi að ræna staðinn í morgun.

"Það fyrsta sem ég varð var við er konan sem kom hettuklædd og með klút fyrir andlitinu að mér baka til í stofunni," segir Stefán Þormar. "Hún muldraði eitthvað um leið og hún otaði að mér hníf."

Stefán segir að hann hafi ekki skilið hvað konan var að segja í fyrstu en loks áttaði hann sig á því að hún sagði að vopnað rán væri í gangi.

"Ég brá á það ráð að ná í stunguskólfu til að verjast konunni," segir Stefán Þormar. "Við það barst leikurinn fram í stofuna þar sem karlmaður á þrítugsaldri kom að mér með hafnarboltaklyfu á lofti og sló til mín."

Stefán segir að hann hafi getað vikið undan högginu sem lenti á peningakassa staðarins með þeim afleiðingum að hann splundraðist niður á gólf og þá tókst konunni að hrifsa skiptimyntina úr honum. Vitorðsmaður hennar reyndi á meðan að slá Stefán í annað sinn en hitti ekki. Það högg fór hinsvegar í tölvu staðarins og braut hana.

Stefán Þormar segir að þegar hér hafi verið komið sögu var kona hans búin að hringja á lögregluna og dóttir hans búin að setja öryggiskerfi staðarins í gang.

"Við þetta flýja þau út og keyra á brott með miklum hraða," segir Stefán. "Einn af fastakúnnum mínum var í kaffi og hann hljóp út á eftir þeim til að ná niður bílnúmerinu. Síðan ætlaði hann sér að elta þau en þau höfðu þá stolið bíllyklunum sem voru í bílnum."

Skömmu síðar kom lögreglan á staðinn og náði parinu við á gangi við Lögbergsbrekku.