Réttarrannsókn á láti Díönu prinsessu

Meira en 10 árum eftir að Díana prinsessa lést í bílslysi í París hefur réttarrannsókn loks hafist á því hvað gerðist kvöldið örlagaríka þegar hún og ástmaður hennar Dodi Al Fayed létust.

Dómari í málinu við konunglega réttinn er Lord Justice Scott Baker. Hann er einn einn virtasti dómari í Englandi og Wales, en gegnir nú stöðu aðstoðardánardómstjóra í vesturhluta London.

Ellefu kviðdómendur munu taka afstöðu í rannsókninni. Þeir munu eyða tveimur dögum í París og meðal annars heimsækja staðinn þar sem parið lést í Pont de l´Alma göngunum. Þeir munu einnig heimsækja Ritz hótelið þar sem Díana og Dodi borðuðu áður en þau lögðu af stað í bílferðina örlagaríku og sjúkrahúsið þar sem Díana lést 31. ágúst árið 1997.

Réttarrannsóknin hófst í síðustu viku við Hæstarétt í London. Kviðdómendum verður flogið í leiguvél til Parísar og munu í tvígang fara yfir síðustu stundirnar í lífi parsins. Fyrst að degi til, en svo í myrkri. Umferð verður stöðvuð á meðan svo kviðdómendur geti gengið um í Alma göngunum óáreitt.

Dómarinn hefur beðið fjölmiðla að fylgja kviðdómendum ekki eftir með myndavélum og ekki að birta neinar myndir sem gætu sýnt andlit þeirra. Þá biður hann fjölmiðla að gefa ekki upp dvalarstað kviðdómenda, jafnvel þótt þeir komist að honum.

Fjöldi lögmanna er við réttarhöldin. Þar á meðal lögmenn Lundúnarlögregelunnar, Ritz hótelsins og Mohamed Al Fayed, eiganda Harrods og föður Dodi. Þegar hann mætti í Hæstarétt við upphaf rannsóknarinnar mætti honum her fjölmiðlamanna hvaðanæva úr heiminum. Hann sagði fréttamönnum að hann vonaðist til að réttlætið næði fram að ganga fyrir Díönu og Dodi. Þau hafi verið myrt af bresku leyniþjónustunni MI6 eftir fyrirskipun frá konungsfjölskyldunni.

Ágangur fjölmiðla að dómshúsinu er þvílíkur að einungis fulltrúar stærstu fjölmiðla eins og BBC, Sky, ITN og CBS News fá að sitja inni í réttarsalnum.

Í garði þessa sögufræga dómshúss er nú tjald sem hýsir meðal annars fjölmiðlafólk sem ekki fékk gullpassann, sem veitir fáum útvöldum aðgang inn í réttarsalinn sjálfan.

Í garðinum sem er á stærð við tvo tennisvelli er fjöldi sjónvarpsskjáa sem sýnir beint úr réttarsalnum. Myndir af skjölum og ljósmyndum sem lagðar eru fram í réttinum eru sýndar á sér skjám. Þá rúllar texti á öðrum skjám sem lýsir gangi mála í salnum og birtist um leið og hlutirnir gerast. Þar birtast stundum áhugaverðar stafsetningavillur eins og „pap rats" í stað paparazzi.

Í réttarsalnum er áréttað fyrir kviðdómendum að hlutverk þeirra sé ekki að finna sökudólga, heldur ákveða hver dó, hvar, hvenær - og, mikilvægast af öllu, - hvernig.

Dómarinn varar kviðdómendur við ágangi fjölmiðla. Þeir verði meira í fjölmiðlum en nokkur annar rannsóknarkviðdómur.

Reiknað er með að réttarrannsóknin taki sex mánuði.