"Ó, þetta er svo ljúft"

Þetta söng bróðurpartur áhorfenda í Köln þegar Þjóðverjar urðu heimsmeistarar í handknattleik í dag og leikmenn liðsins trylltust af fögnuði niðri á gólfi, klæddir kórónum og gerviskeggi. Þessi útbúnaður sem sjá má hér á myndinni var til heiðurs núverandi- og fyrrverandi þjálfurum liðsins.

Yfirskeggið stóra var að sjálfssögðu til heiðurs Heiner Brand þjálfara, sem hefur verið kallaður "Heysátan" fyrir skeggið góða. Kórónan var aftur sett upp til heiðurs Vlado Stenzel gamla, en hann þjálfaði heimsmeistaralið Þjóðverja árið 1978 sem þá vann frækinn sigur á Sovétmönnum í úrslitaleik í Kaupmannahöfn. Þar var núverandi þjálfari Heiner Brand fyrirliði liðsins.