Punxsutawney Phil sá ekki skuggann sinn

Múrmeldýrið Punxsutawney Phil sá ekki skuggann sinn þegar það var tekið úr búri sínu í bænum Punxsutawney í Pennsylvaníu ríki í Bandaríkjunum í dag. Það táknar að vorið eigi eftir að koma snemma.

Þýskir innflytjendur í bænum komu með siðinn og var fyrsta hátíðin haldin árið 1886. Síðan þá hefur múrmeldýrið Phil séð skuggann sinn í 96 skipti. Þetta var aðeins í 15 skiptið sem Phil sér ekki skuggann sinn.

Mikil hátíðahöld voru í dag í tengslum við hátíðina og talið er að 15 þúsund manns hafi sótt hana. Flugeldum var skotið á loft og Pennsylvaníupolki spilaður.

Hátíðahöldin í kringum múrmeldýrið voru gerð ódauðleg í kvikmyndinni „Groundhog Day" en í henni lék Bill Murray fréttamann sem kom til bæjarins til þess að segja frá spá Phils. Dagurinn endurtók sig síðan aftur og aftur fréttamanninum til mismikillar ánægju.