Markahæstur í mótlæti

Snorri Steinn Guðjónsson er sá leikmaður íslenska handboltalandsliðsins sem hefur skorað flest mörk þegar íslenska landsliðið hefur verið undir í leikjum sínum á HM í handbolta. Óskar Ófeigur Jónsson, blaðamaður á Fréttablaðinu, hefur tekið saman skemmtilegan tölfræðipakka um framlag Snorra á HM til þessa.

Snorri Steinn hefur margoft sýnt það að hann er sá leikmaður liðsins sem er tilbúin í að taka mikla ábyrgð innan íslenska landsliðsins og þrátt fyrir ungan aldur hefur hann alltaf verið tilbúinn að taka af skarið þegar á reynir. Þetta sannaðist enn einu sinni í leiknum gegn Dönum í átta liða úrslitunum þegar hann kom íslenska liðinu nánast upp á sitt einsdæmi inn í leikinn aftur. Snorri Steinn kórónaði framgöngu sína með því að tryggja íslenska liðinu framlengingu með marki úr vítakasti nokkrum sekúndum fyrir leikslok.

Snorri Steinn hefur skorað 24 af 45 mörkum sínum þegar íslenska landsliðið hefur verið undir í leikjum sínum á HM í handbolta eða sex mörkum fleira en Guðjón Valur Sigurðsson sem kemur honum næstur í markaskorun við slíkar aðstæður. Snorri Steinn hefur skorað 10 af þessum 24 mörkum sínum af vítalínunni en hann hefur nýtt 91% af vítum sínum þegar íslenska landsliðið hefur verið undir í sínum leikjum.

Átta af átján mörkum Guðjóns Vals hafa komið úr fyrstu bylgju í hraðaupphlaupi en næstur Snorra Stein í mörkum úr uppsettum sóknum er Ólafur Stefánsson. Snorri Steinn hefur skorað 21 mark úr uppsettum sóknum og fimm til viðbótar úr annarri bylgju hraðaupphlaups. Ólafur Stefánsson hefur skorað 16 mörk úr uppsettum sóknum og eitt til viðbótar úr annarri bylgju hraðaupphlaups.

Þegar tekin inn í dæmið mörk þegar íslenska landsliðið er undir en enn inn í leiknum eykst forusta Snorra Steins enn. Skilgreiningin á að vera inn í leiknum er að það sé fjögurra marka munur eða minni á liðunum. Snorri Steinn hefur skorað 22 af þessum 24 mörkum við þær kringumstæður sem er 8 mörkum meira en næsti maður sem er landsliðsfyrirliðinn Ólafur Stefánsson en Ólafur hefur skorað 14 mörk þegar Ísland er undir en enn inn í leiknum.

Ólafur Stefánsson er hinsvegar sá leikmaður liðsins sem hefur búið til flest mörk þegar landsliðið hefur verið undir á HM í handbolta. Ólafur hefur komið að 47 mörkum við þær kringumstæður eða 11 fleiri en Snorri Steinn. Hér munar mestu um stoðsendingar Ólafs en hann hefur átt 25 stoðsendingar þegar íslenska landsliðið hefur verið undir í sinum leikjum í Þýskalandi.

Þeir Ólafur og Snorri Steinn eru mennirnir sem aðrir leikmenn treysta á þegar íslenska landsliðið glímir við mótlæti og þarf nauðsynlega á markvissum sóknum á að halda. Ólafur er núverandi fyrirliði liðsins en með framgöngu sinni hefur Snorri Steinn enn og aftur sýnt að hann er leiðtogi liðsins og afar líklegur til að taka fyrir fyrirliðabandinu í framtíðinni.

ooj@frettabladid.is



Mörk Snorra Steins þegar Ísland er undir:

Kringumstæður

5 mörkum undir 2 mörk

4 mörkum undir 4

3 mörkum undir 3

2 mörkum undir 7

1 marki undir 8

Skipting marka:

Vítaköst 10

Gegnumbrot 6 (4 í seinni bylgju)

Langskot 4 (1)

Lína 4

Flest mörk þegar Ísland er undir:

Snorri Steinn Guðjónsson 24

Guðjón Valur Sigurðsson 18

Ólafur Stefánsson 17

Alexander Petersson 16

Logi Geirsson 14

Markús Máni Michaelsson 10

Róbert Gunnarsson 9

Ásgeir Örn Hallgrímsson 2

Arnór Atlason 1

Sigfús Sigurðsson 1

Vignir Svavarsson 1



Flest sköpuðu mörk þegar Ísland er undir:

Ólafur Stefánsson 47

17 mörk+25 stoðsendingar+5 fiskuð víti

Snorri Steinn Guðjónsson 36

24 mörk+9 stoðsendingar+3 fiskuð víti

Logi Geirsson 22

14 mörk+8 stoðsendingar

Alexander Petersson 21

16 mörk+5 stoðsendingar

Guðjón Valur Sigurðsson 20

18 mörk+2 stoðsendingar

Róbert Gunnarsson 13

9 mörk+1 stoðsendingr+3 fiskuð víti