Oechsler: Réðum ekkert við Snorra Stein

Anders Oechsler, leikmaður danska landsliðsins átti frábæran leik gegn íslendingum í kvöld en skrifaði sigurinn skuldlaust á dönsku liðsheildina. Hann viðurkenndi að liðið hefði ekki átt eitt einasta svar við stórleik Snorra Steins Guðjónssonar.

"Það getur vel verið að ég hafi leikið ágætlega en það var liðsheildin sem skóp þennan sigur. Íslenska liðið er engu að síður mjög sterkt og við réðum ekkert við Snorra Stein í leiknum. Þetta er stærsta stund sem ég hef upplifað og ég á ekki orð til að lýsa því hvernig mér líður," sagði Oechsler í samtali við TV2.