Ólýsanlega sárt

Guðmundur Guðmundsson aðstoðarþjálfari íslenska landsliðsins var að vonum bragðdaufur eftir tapið gegn Dönum í kvöld og sagði það ólýsanlega sárt. Hann sagðist þó mjög stoltur af íslenska liðinu fyrir frammistöðu þess í kvöld.

"Áður en ég segi nokkuð annað vil ég bara byrja á því að segja það að strákarnir stóðu sig stórkostlega vel í kvöld og sýndu mikinn karakter og því er þetta auðvitað ólýsanlega sárt að tapa þessu í kvöld. Maður bara getur ekkert sagt," sagði Guðmundur í samtali við Geir Magnússon á Rúv eftir leikinn.

Geir spurði Guðmund hvort hann hefði verið sáttur við varnarleik íslenska liðsins í kvöld, en hann varð liðinu klárlega að falli í leiknum. "Við reyndum nokkur mismunandi varnarafbrigði í kvöld en þau gengu ekki upp - og raunar hefði þessi leikur geta dottið hvoru megin sem var og tilviljun réði því hvoru megin sigurinn lenti. Ef skotið hjá Alexander í restina hefði farið í stöngina og inn hefði þetta líklega dottið okkar megin - mér fannst reyndar vera brotið á honum þegar hann fór inn - en þetta féll þeirra megin í dag," sagði Guðmundur og bætti við að sóknarleikur íslenska liðsins hefði verið stórkostlegur.