Íslenski draumurinn úti

Danir sigruðu með marki á lokasekúndu framlengingar í átta liða úrslitum á HM í handbolta, lokastaðan 42-41 fyrir Dönum. Íslendingar voru með pálmann í höndunum þegar um hálf mínúta var eftir, staðan jöfn og Íslendingar með boltann en glopruðu tækifærinu og því fór sem fór. Íslendingar leika því um 5-8 sætið á HM. Þar mætir liðið Rússum í leik sem ræður því hvort þeir leika um 5. sætið eða 8. sætið. Danir hinsvegar hafa bókað sætið í undanúrslitunum þar sem þeir mæta Pólverjum. Leikirnir fara fram á fimmtudag.

Íslenska liðið leiddi í hálfleik eftir að hafa verið mest þremur mörkum yfir. Í seinni hálfleik seig hinsvegar á ógæfuhliðina og átti liðið slæman kafla í fyrri hluta hálfleiksins og voru mest fjórum mörkum undir. Íslendingarnir komu til baka á síðustu tíu mínútum hálfleiksins með Snorra Stein Guðjónsson fremstan í flokki. Snorri Steinn skoraði fjögur síðustu mörk liðsins og þar á meðal jöfnunarmarkið úr víti þegar fjórar sekúndur voru eftir af venjulegum leiktíma.

Íslendingar náðu að komast yfir í fyrri hluta framlengingar og höfðu tækifæri til að komast tveimur mörkum yfir þegar Logi Geirsson kastaði boltanum klaufalega í hendurnar á Dananum Sören Stryger og því var staðan jöfn í hálfleik framlengingarinnar í stað þess að Íslendingar væru tveimur mörkum yfir.

Íslendingar fengu aftur tækifæri til að gera út um leikinn á lokasekúndum leiksins, en þeir héldu í sókn þegar hálf mínúta var eftir og staðan jöfn. En í stað þess að tryggja sér sigur átti Alexander Petersson misheppnað skot og Danir fengu að eiga lokaorðið í leiknum. Lars Möller Madssen nýtti tækifærið vel fyrir Dani og skoraði sigurmarkið um leið og leiktíminn rann út.

Íslendingar léku vel í sókninni með Snorra Stein fremstan í flokki en vörnin og markvarslan brugðust í leiknum og skyttur danska liðsins skoruðu að vild fyrir utan en Michael Knudsen og Anders Oechsler skoruðu níu mörk hvor.

Markaskorarar Íslands:

Snorri Steinn Guðjónsson 15

Alexander Petersson 3

Ólafur Stefánsson 6

Logi Geirsson 6

Guðjón Valur Sigurðsson 5

Róbert Gunnarsson 4

Sigfús Sigurðsson 1

Ásgeir Örn Hallgrímsson 1