Pólverjar með grófasta liðið á HM

Pólska landsliðið er grófasta liðið á HM til þessa samkvæmt stigagjöf Alþjóða Handknattleikssambandsins. Þessar niðurstöður eru reiknaðar út frá tveggja mínútna brottrekstrum og gulum og rauðum spjöldum. Suður-Kórea er þannig prúðasta liðið á HM fyrir keppni dagsins í dag, en íslenska liðið er þar í 14. sæti.

Pólverjar eru með 18,5 "refsistig" að meðaltali í leik og eru þar með "grófasta" liðið í keppninni. Suður-Kóreumenn eru aðeins með 7 refsistig að meðaltali í leik og íslenska liðið er með 12,8 stig í leik. Þó ber að hafa í huga að Kóreumennirnir höfðu aðeins spilað þrjá leiki þegar þessi tölfræði var tekin saman.

Pólverjar hafa fengið 3 rauð spjöld, 11 gul og verið reknir af velli 24 sinnum. Íslenska liðið er raunar í 3-4 sæti þegar mið er tekið af 2 mínútna brottvísunum og hefur þar hlotið 20 brottvísanir líkt og Þjóðverjar. Slóvenar hafa fengið 25 brottvísanir og Pólverjar 24.