Arnór Atlason í hópinn gegn Túnis

Alfreð Gíslason landsliðsþjálfari hefur tekið Arnór Atlason aftur inn í íslenska landsliðshópinn sem mætir Túnis klukkan 16:30 í dag. Arnór kemur inn í stað Ragnars Óskarssonar og þá verður Roland Eradze í markinu í stað Hreiðars Guðmundssonar. Logi Geirsson er í hópnum þrátt fyrir að hafa meiðst á ökkla í leiknum við Frakka.

 

Í Dortmund er fallegt veður, ískalt en logn. Íslensku stuðningsmennirnir eru dreifðir um borgina og sumir dvelja í Halle þar sem tveir af leikjum Íslands fara fram. Þeir hafa því ekki stað til að koma saman á fyrir leikinn.

Þorsteinn J., fréttamaður Íslands í dag, spjallaði við nokkra blaðamenn frá Túnis sem eru mjög kvíðnir fyrir leiknum við Íslendinga. Þeir sögðu Túnisa mæta með sitt sterkasta lið til leiks.

„Íslenska liðið var að koma í hús. Ég sé stríðsmálaða áhangendur Túnis hér um allt en minna af Íslendingum. Það er ómögulegt að spá fyrir um úrslit leiksins. Ég vona bara að Ísland nái að spila sinn leik og verði ekki dregnir niður á plan andstæðinganna eins og á móti Úkraínu," sagði Þorteinn J. sem staddur er í Dortmund á vellinum.