Ævintýralegur fyrri hálfleikur

Ísland hefur yfir 18-8 þegar flautað hefur verið til leikhlés í lokaleik liðsins gegn Frökkum í B-riðli heimsmeistaramótsins í handbolta. Segja má að allt hafi gengið upp hjá íslenska liðinu fyrstu 30 mínúturnar, en liðið komst í 5-0 og náði svo tíu marka forskoti undir lok hálfleiksins.

Ólafur Stefánsson er markahæstur í íslenska liðinu með 5 mörk, Logi Geirsson skoraði 4 mörk í byrjun leiksins en þurfti svo að fara meiddur af velli og Guðjón Valur og Markús Máni hafa skorað 2 mörk. Þá hefur Birkir Ívar farið mikinn í markinu og hefur varið ein 11 skot - þar af tvö víti.