Frakkar söltuðu Ástrali

Fimm leikjum er lokið á HM í handbolta í dag og óhætt er að segja að þeir hafi allir unnist nokkuð örugglega. Þrátt fyrir fádæma sigur Frakka á Áströlum tókst þeim ekki að slá met okkar Íslendinga yfir stærstu sigra í sögu HM en til þess vantaði þá fjögur mörk í viðbót.

Í A-riðli sigruðu Túnisar Grænland með 36 mörkum gegn 20 eftir að hafa verið 13 mörkum yfir í hálfleik. Frakkar unnu sem fyrr segir Ástrala með miklum yfirburðum, 47-10 sem er næst stærsti sigur í sögu HM á eftir 55-15 sigri Íslands á Áströlum á HM 2003. Frakkar voru með 78% skotnýtingu gegn 21% Ástrala.

Pólverjar sigruðu Brasilíumenn með átta mörkum í C-riðli, 31-23 eftir að hafa haft aðeins tveggja marka forystu í hálfleik. Í D-riðli unnu heimsmeistararnir frá Spáni Katarmenn með yfirburðum, 41-18 og í F-riðli hristu Rússar af sér slyðruorðið eftir jafnteflið á móti Kóreumönnum í gær með öruggum 35-19 sigri á Marakkó.