Juan Garcia í nærmynd

Eftir að hafa borið víurnar í hann í mörg ár, tókst stórliðinu Barcelona loksins að lokka hinn eldfljóta hornamann Juan Garcia til sín þegar hann gekk til liðs við þá frá heimaliðinu Ademar Leon árið 2005.

Garcia var lykilmaður í meistaraliði Ademar Leon sem skaut stórliðunum ref fyrir rass tímabilið 2000-2001 og hefur í mörg ár verið lykilmaður í spænska landsliðinu, þar á meðal því sem tryggði sér heimsmeistaratitilinn fyrir tveimur árum.

Juan Garcia, sem lék sinn fyrsta leik í spænsku deildinni aðeins 17 ára gamall, er hornamaður af gamla skólanum; góður í uppspilinu í sóknarleiknum og ógnarfljótur í hraðaupphlaupum þar sem hann getur stungið flesta aðra af.

Árið 2004 var Garcia valinn besti handboltamaður heims og sama ár var hann valinn besti vinstri hornamaðurinn bæði í spænsku deildinni og á Ólympíuleiknum í Aþenu.

Ásamt hægri hornamanninum Albert Rocas lék Garcia geysimikilvægt hlutverk þegar Spánverjum tókst árið 2005 loksins að tryggja sér gullverðlaun á stórmóti. Garcia er einnig afar örugg vítaskytta og hefur sem slíkur skorað mörg ómetanleg mörk fyrir bæði landslið sitt og félagslið.

Staða: Vinstra horn

Fæddur: 28 ágúst 1977 í Leon á Spáni

Félagslið: Barcelona á Spáni