Þjóðhátíðardagur haldinn hátíðlegur

Í dag er 17. júní þjóðhátíðardagur Íslendinga og fæðingardagur sjálfstæðishetjunnar Jóns Sigurðssonar. Dagurinn er haldinn hátíðlegur um allt land en í Reykjavík hefst formleg dagskrá núna klukkan tíu með því að Hanna Birna Kristjánsdóttir, forseti borgarstjórnar, leggur blómsveig frá Reykvíkingum að leiði Jóns Sigurðssonar í gamla kirkjugarðinum við Suðurgötu.

Þar mun Lúðrasveitin Svanur einnig leika "Sjá roðann á hnjúkunum háu. Klukkan tuttugu mínútur fyrir ellefu hefst dagskrá á Austurvelli þar sem Ólafur Ragnar Grímsson, forseti Íslands, leggur blómsveig frá íslensku þjóðinni að styttu Jóns Sigurðssonar.

Formaður þjóðhátíðarnefndar flytur ávarp og Karlakór Reykjavíkur syngur áður en Geir H. Haarde forsætisráðherra flytur ávarp. Eftir það ávarpar fjallkonan hátíðargesti. Þjóðhátíðardagskrá verður síðan víðsvegar um höfuðborgina í allan dag og langt fram á kvöld, sem og í öllum bæjarfélögum, þorpum og sveitum landsins.

Íslendingar hlutu fullt sjálfstæði frá Dönum hinn 17. júní 1944 þegar lýðveldi var stofnað á Þingvöllum og Sveinn Björnsson ríkisstjóri var kjörinn fyrsti forseti Íslands. Íslendingar höfðu þá játast ýmist noregs- eða danakonungum frá árinu 1262. Alþingi var hins vegar fyrst stofnað á Þingvöllum árið 930.