Wilson biður um frið til að ná heilsu

Gamanleikarinn Owen Wilson sem dvelur nú á spítala eftir meinta sjálfsmorðstilraun hefur beðið fjölmiðla um að leyfa sér að ná heilsu í friði. Hann var fluttur í skyndi á sjúkrahús á sunnudag eftir að hafa tekið inn lyf og skorið sig á púls.

"Ég bið fjölmiðla vinsamlega um að leyfa mér að þiggja meðferð og ná heilsu í friði á þessum erfiðu tímum," segir í tilkynningu frá leikaranum.

Talsmaður spítala í Los Angeles sem Wilson dvelur á sagði í samtali við AP fréttastofuna að ástand leikarans væri gott. Hann vildi ekki gefa upp ástæðu innlagnarinnar.