Guðjón Valur fjórði markahæstur á HM

Guðjón Valur Sigurðsson, leikmaður íslenska landsliðsins í handknattleik, er í fjórða sæti yfir markahæstu menn á heimsmeistaramótinu nú þegar keppni í milliriðlum er lokið. Þá hefur Ólafur Stefánsson átt flestar stoðsendingar alla á mótinu.

Guðjón Valur hefur skorað 47 mörk í sjö leikjum eins og Rússinn Edouard Koksharov, en þess má geta að aðeins eitt marka Guðjóns hefur komið úr víti á meðan Koksharov hefur skorað 19 mörk úr vítum.

Markahæstur á mótinu er Tékkinn Filip Jicha sem skorað hefur 55 mörk en Grænlendingurinn Angutimmarik Kreutzmann er næstmarkahæstur með 49 mörk. Þá er Suður-Kóreumaðurinn Chi-Hyo Cho í þriðja sæti með 48 mörk. Næstir Íslendinga á listanum eru Logi Geirsson með 36 mörk í 16. sæti og Alexander Petersson er í 17. sæti yfir markahæstu menn með 34 mörk.

Ólafur Stefánsson ber höfuð og herðar yfir aðra leikmenn mótsins þegar kemur að stoðsendingum en hann hefur nú þegar gefið 35 stoðsendingar, sex fleiri en Króatinn Ivano Balic. Þá er Logi Geirsson í fimmta sæti á þessum lista með 26 stoðsendingar.

Þegar lagðar eru saman stoðsendingar og mörk eru Ólafur og Logi í öðru og þriðja sæti á eftir Tékkanum Filip Jicha en Guðjón Valur er í sjötta sæti. Þá er Guðjón Valur í þriðja sæti á mótinu þegar horft er til stolinna bolta, en hann hefur stolið 11 boltum af mótherjanum til þessa.