Kjötsúpa fyrir yfir 2.000 manns á Skólavörðustíg

Stóri kjötsúpudagurinn er í dag á Skólavörðustíg með ýmsum uppákomum og sýningum upp og niður götuna. Jóhann Jónsson eigandi Ostabúðarinnar hefur veg og vanda að gerð kjötsúpunnar og hefur soðið 350 lítra af henni. Hann reiknar með að það dugi fyrir yfir 2.000 manns.

Siggi Hall á Óðinsvéum hefur ávallt lagt hönd á plóginn við kjötsúpugerðina en er fjarri góðu gamni nú, staddur erlendis að kenna mönnum að elda lambakjöt. "Ég sagði honum að þetta yrði í fyrsta og síðasta sinn sem hann verði fjarverandi," segir Jóhann.

Hluti af kjötsúpunni var eldaður í gær enda súpan ávallt betri upphituð. Jóhann segir að hann hafi fengið aðgang að eldhúsinu á Óðinsvéum til þessa verks. Í súpuna fara um 70 kg af kjöti og annað eins af grænmeti og er hún á hefðbundum nótum.

Eins og ávallt áður verður föngum og fangavörðum í Hegningarhúsinu boðið fyrst upp á kjötsúpu kl. 14.00 og síðan gestum og gangandi. Miðað við gott veður í dag er búist við að 5-6.000 manns kíki við á Skólavörðustígnum.

Af öðrum viðburðum sem í boði eru á Skólavörðustíg má nefna menningargöngu Birnu Þórðardóttur kl. 14.00. Safnast er saman við styttu Leifs heppna og Stígurinn kannaður til hlýtar. Gangan er í boði Höfuðborgarstofu.