Ótrúleg afbrotasaga

Nýverið var þingfest mál í Hérasdómi Reykjavíkur þar sem hópur ungmenna var ákærður í alls 70 liðum vegna afbrota sem framin voru að langmestu leyti frá júlíbyrjun í fyrra og fram í lok janúar síðastliðins. 

Í hópnum sem málið beinist að eru tíu manns á aldrinum fimmtán til 26 ára. Ákæruliðirnir eru alls 70 talsins og eru flestir þeirra vegna innbrota og annarra þjófnaða, fjársvika, fíkniefnamisferlis, eignarspjalla og mýmarga bílþjófnaða. Þrír menn tengjast langflestum brotunum, þeir Davíð Þór Gunnarsson (19 ára), Sigurbjörn Adam Baldvinsson (22 ára) og Jon Einar Randversson (24 ára). Þeir hlutu allir fangelsisdóma í febrúar síðastliðnum sem hluti af Árnesgenginu svokallaða.

Því fer nærri að mennirnir séu nokkurskonar methafar í þessari tegund afbrota. Á tímabilinu júní 2006 til og með janúar 2007 voru 1.007 einstaklingar á aldrinum 16-25 ára kærðir fyrir hegningar eða sérrefsilagabrot (önnur en umferðarlagabrot) hjá embættum sem nú tilheyra embætti lögreglustjórans á höfuðborgarsvæðinu. Langstærsti hluti þeirra voru aðeins með eitt mál en um fjögur prósent einstaklinga á þessum aldri voru með fimm mál eða fleiri á tímabilinu. Sá sem var með flest var með 36 mál, en það eru ekki endilega allt mál sem farið hafa í ákæru. Þeir Sigurbjörn (39 ákæruliðir) og Davíð (38 ákæruliðir) eru því greinilega nokkuð sér á báti.

Helgi Gunnlaugsson, prófessor í félagsfræði sagði nýverið í Fréttablaðinu að um óvenjulega mikla virkni væri um að ræða hjá litlum hópi fólks á ekki lengra tímabili. „Ég man ekki eftir öðrum eins fjölda afbrota á svona skömmum tíma. Þarna er líklega um að ræða ákveðin kjarnahóp þar sem afbrot eru hluti af lífstíl. Þetta er einfaldlega það sem þau gera.“