Tryggvi: Reynslan tók þetta

Tryggvi Guðmundsson var gríðarlega ánægður eftir sigurinn á Fjölni í bikarúrslitunum í dag eins og aðrir FH-ingar.

„Tilfinningin er hrikalega góð en leikurinn var slakur. Það skipti þó engu máli þar sem við kláruðum þetta. En við gerðum okkur frekar erfitt fyrir í dag.“

Hann neitar þó því að þetta sé súrsætur sigur þar sem FH varð af Íslandsmeistaratitlinum nú um síðustu helgi.

„Þetta er bara allt annað mót sem við sigruðum í. Við komum til með að fagna þessu vel og innilega.“

Hann segir að FH-ingar hafi mætt ágætlega til leiks en eftir markið hafi gömul saga endurtekið sig. „Við bökkum of mikið og höldum að þetta gerist af sjálfu sér. Þar með hleyptum við þeim inn í leikinn og þeir pressa mikið á okkur í seinni hálfleik. Það endaði með því að við fengum á okkur mark.“

Tryggvi átti stoðsendinguna á Matthías í sigurmarkinu í framlengingunni og var ánægður með það.

„Eigum við ekki að segja að reynslan hafi tekið þetta í dag.“