Þjóðverjar lögðu Slóvena

Þjóðverjar sigruðu Slóvena með 35 mörkum gegn 29 í milliriðli 1 á HM í handbolta rétt í þessu. Þjóðverjar vinna sér þar með inn sín fyrstu stig í riðlinum og fara upp að hlið Slóvena og Pólverja.

Pascal Hens var markahæstur í liði Þjóðverja með 9 mörk og Florian Kehrmann skoraði 8, en Siarhei Rutenka skoraði 12 fyrir Slóvena.

Íslendingar eru efstir í riðlinum eftir sigurinn á Túnis með 4 stig. Frakkar og Pólverjar leika í kvöld en fyrir leikinn eru Pólverjar með 2 stig en Frakkar stigalausir.

Í hinum milliriðlinum sigruðu Ungverjar Tékka með 28 mörkum gegn 25 og eru komnir með 4 stig í riðlinum. Leikur Spánverja og Rússa stendur enn yfir en Spánverjar hafa verið á undan að skora í hnífjöfnum leik. Í kvöld leika svo Danir við Króata.