Upphitun fyrir Ísland - Túnis í dag

Íslendingar mæta Túnisum í fyrsta leik milliriðlakeppninnar á HM í handbolta klukkan 16:30 í dag. Túnisar hafa á að skipa liði sem hefur getu og burði til að fara langt á þessu heimsmeistaramóti, líkt og þeir sýndu þegar þeir lentu í fjórða sæti á heimavelli á HM fyrir tveimur árum. Eins eru Túnisar margfaldir Afríkumeistarar og á undanförnum árum hafa einungis Egyptar getað velgt þeim eitthvað undir uggum í Afríku.

Sterkusti leikmaður Túnisa er rétthenda skyttan Wissem Hmam sem leikur með Montpellier í Frakklandi og hefur skorað 17 mörk á mótinu til þessa. Margir leikmenn Túnisa leika í Frakklandi og þykir leikstíll þeirra um margt minna á Frakkana, bæði í hröðum sóknarleik og framliggjandi 3-2-1 vörn.

Túnisar fóru nokkuð öruggt í gegnum riðlakeppnina en þeir sigruðu bæði Grænland og Kúveit nokkuð stórt áður en þeir töpuðu nokkuð óvænt í síðasta leik gegn Slóvenum og má því búast við því að þeir séu nokkuð áfjáðir í að sýna betri leik í dag.

Leikir dagsins í milliriðlum:

Tékkland - Ungverjaland kl. 15:15

Slóvenía - Þýskaland kl 15:15

Ísland - Túnis kl 16:30

Spánn - Rússland 17:15

Frakkland - Pólland kl 18:30

Danmörk - Króatía kl 19:15