Onesta kennir lélegum undirbúningi um tapið fyrir Íslendingum

Claude Onesta, þjálfari franska landsliðsins í handbolta, segir að undirbúningur liðsins fyrir leikinn gegn Íslendingum hafi verið ástæða tapsins stóra. Nikola Karabatic sagði áhorfendur líka hafa spilað stóran þátt í sigri íslenska liðsins.

"Þegar annað liðið undirbýr sig fyrir að fara í stríð og hitt undirbýr sig eins og það sé að fara í sveitina í frí - er þetta niðurstaðan. Ég vona að við getum gert það sama við andstæðinga okkar í keppninni sem íslenska liðið gerði við okkur í þessum leik," sagði Onesta þjálfari.

"Ég veit ekki hvað ég á að segja, en það var allt á móti okkur í þessum leik. Ekki bara Íslendingarnir, heldur líka allir áhorfendur í höllinni. Eftir að við lentum undir 5-0 náðum við ekki að taka okkur saman í andlitinu. Við erum að vísu komnir áfram, en framhaldið verður erfitt því við erum búnir að nota þennan lélega leik sem maður getur stundum leyft sér að eiga á svona móti," sagði Nikola Karabatic.