Kvikmynd um leiðtogafundinn í Höfða í undirbúningi

Framleiðendur í Hollywood eru að undirbúa kvikmynd um leiðtogafundinn í Höfða. Hugmyndir eru um að Warren Beatty leiki Ronald Reagan og Anthony Hopkins leiki Mikael Gorbatsjov. Fulltrúar Clints Eastwoods og breska leikstjórans Ridleys Scott hafa fundað með fulltrúum Reykjavíkurborgar um málið.

Leiðtogafundur Ronalds Reagans þáverandi Bandaríkjaforseta og Mikhail Gorbatsjov leiðtoga Sovétríkjanna sem haldinn var í Höfða 11.október árið 1986 hefur oft verið talinn upphafið af endalokum kalda stríðsins. Talið hefur verið að leiðtogafundurinn hafi einnig verið einn af hápunktum forsetaferils Ronalds Regans þáverandi Bandaríkjaforseta.

Nú eru uppi hugmyndir að gera kvikmynd um leiðtogafundinn frá upphafi til enda. Fjögurra manna kvikmyndateymi sem starfað hefur náið með breska leikstjóranum Ridley Scott og bandaríska leikarananum Clint Eastwood komu til landsins í byrjun vikunnar og áttu fund með borgarstjóra.

Jón Kristinn Snæhólm, aðstoðarmaður borgarstjóra, segir að borgaryfirvöld muni gera allt sem í þeirra valdi standi til að gera þeim kleift að taka upp kvikmyndina. Ekki hefur enn verið ákveðið hvort af kvikmyndinni verður en Jón Kristinn segir það mjög líklegt. Unnið sé að því að fjármagna myndina og verið er að skrifa frumhandrit sem þekktustu handritahöfundar Bandaríkjanna komi að.

Engar tímasetningar hafi verið ákveðnar en stefnt sé að því að hefja tökur á næsta ári ef af verði. Jón Kristinn segir að uppi séu hugmyndir um að stórstjörnur fari með hlutverk í myndinni og nefnt hafi verið að bandaríski leikarinn Warren Betty færi með hlutverk Ronalds Reagans og breski leikarinn Anthony Hopkins leiki Mikhail Gorbatsjov.