Höfrungshræ í fjörunni við Voga

Sorgleg sjón blasti við þeim sem lögðu leið sína um fjöruna syðst við þéttbýlið í Vogum í morgun eftir því sem segir á vef Víkurfrétta. Þar hafði höfrungskýr rekið á land og út úr henni hékk hræ kálfs.

Segir á vefnum að líkum megi leiða að því að móðirin hafi gefið upp öndina í fæðingu því sporður kálfsins sneri út og telur Þorvaldur Örn Árnason, íbúi í Vogum og líffræðingur, að kálfurinn hafi stöðvast á bægslunum og fest í burðarliðnum.

Ekki var mikið eftir af kálfinum því allt hafði verið étið innan úr honum en kýrin var hins vegar nær alveg heil. Þorvaldur telur líklegast að höfrungurinn sé af hnýðingstegund. Náttúrufræðistofa mun taka sýni úr skepnunni og Umhverfisstofnun svo farga hræinu.