Stóra smyglskútumálið á Fáskrúðsfirði

Tíu menn voru handteknir á Norðurlöndunum í dag vegna stærsta smyglmáls Íslandssögunar. Lögreglan fann rúmlega 60 kíló af eiturlyfjum í seglskútu í Fáskrúðsfjarðarhöfn og handtók þrjá menn á staðnum. Undir lok dags höfðu fimm menn verið dæmdir í gæsluvarðhald á Íslandi. Þrír til viðbótar eru í haldi lögreglu Færeyjum og Noregi. Þá hefur pari sem var handtekið í Danmörku verið sleppt.

Um klukkan 05:00 í morgun sigldi tæplega 30 feta seglskúta inn Fáskrúðsfjörð. Um borð voru tveir menn, Guðbjarni Traustason og Alvar Óskarsson, og rúmlega 60 kíló af hvítu efni. Um var að ræða amfetamín, e-töfluduft og e-töflur.

Þeir lögðu skútunni að bryggjunni og fóru í frystihúsið sem stendur skammt frá. Þar fengu þeir að hringja og spurðu í leiðinni hvort þeir væru ekki örugglega staddir á Fáskrúðsfirði. Þvi næst héldu þeir aftur um borð í skútuna.

Þá lét hópur sérsveitamanna til skarar skríða en lögreglan hafði fylgst með ferðun skipverjanna og samstarfsmanna þeirra um nokkurt skeið. Skipverjarnir voru umsvifalaust handteknir ásamt þriðja manninum sem kom frá Reykjavík að taka á móti þeim á bílaleigubíl.

Aðgerðum lögreglu var langt frá því að vera lokið eftir handtökurnar á Fáskrúðsfirði. Varðskip sigldi inn fjörðinn og lagðist að skútunni, kafarar köfuðu í höfninni til að kanna hvort einhverjum efnum hefði verið kastað frá borði. Þar að auki voru húsleitir og handtökur gerðar í Danmörku, Noregi og á höfðuðborgarsvæðinu.

Alls höfðu tíu manns verið handteknir þegar dagurinn var liðinn. Á blaðamannafundi lofuðu forsvarsmenn lögreglunnar samstarf hinna ýmsu löggæsluaðila sem að málinu komu, hér heima og erlendis. Málið þykir mikill sigur fyrir lögregluna.

Guðbjarni og Alvar, sem handteknir voru í skútunni, voru keyrðir til Reykjavíkur í lögreglubíl en flogið var til borgarinnar með manninn sem kom á bílaleigubílnum.

Þeir þrír, ásamt þeim Bjarna Hrafnkelssyni og Einar Jökli Einarssyni sem handteknir voru á Höfðuborgarsvæðinu, voru allir leiddir fyrir dómara Héraðsdóms Reykjavíkur sem úrskurðaði mennina í gæsluvarðhald.

Þeir munu dúsa í einangrun fram yfir helgi en lögregla hyggst ekki hefja yfirheyrslur yfir mönnunum fyrr en þá.

Greint var frá fíkniefnafundinum á Fáskrúðsfirði í vefútgáfu danska dagblaðsins BT. Þar sagði að tveir Íslendingar hafi verið handteknir í Kaupmannahöfn vegna málsins og að þá hafi danska lögreglan einnig lagt hald á fíkniefni. Þeim hefur nú verið sleppt og er mál þeirra ekki talið tengjast smyglmálinu.

Þá voru tveir handteknir í Færeyjum, Íslendingur og Dani, 23 og 24 ára gamlir. Í þeirri aðgerð fundust um tvö kíló af amfetamíni.

Aðgerð lögreglunnar, sem nefndist Pólstjarnan, hafði staðið yfir í langan tíma. Unnið var í samstarfi við lögregluyfirvöld í Danmörku, Færeyjum, Þýskalandi, Hollandi og Noregi. Tengiliður íslensku lögreglunnar hjá Europol sá um samstarfið.

Áætlað götuverðmæti efnanna nemur að minnsta kosti hálfum milljarði.

Smyglskútan var flutt á föstudag, 21. september til Reykjavíkur og þar átti að fara fram nákvæmnisleit um borð.

Á blaðamannafundi lögreglunnar sem haldinn var að morgni föstudags var nánar greint frá atriðum málsins og fíkniefnin höfð til sýnis.

Vísir hefur heimildir fyrir því að Einar Jökull og bróðir hans Logi Freyr, sem eru í gæsluvarðhaldi vegna málsins, hafi haustið 2005 komið til Fáskrúðsfjarðar á skútu sem bar nafnið Lucky Day. Skútuna skildu þeir eftir í höfninni og sóttu hana ekki fyrr en vorið 2006.