Gott hljóð í bílarisanum

Bandaríski bílaframleiðandinn General Motors, annar umsvifamesti bílaframleiðandi í heimi á eftir Toyota, skilaði hagnaði upp á 62 milljónir dala, tæpa fjóra milljarða íslenskra króna, á fyrstu þremur mánuðum ársins. Þetta er samdráttur upp á 90 prósent samanborið við sama tíma í fyrra og talsvert undir væntingum greinenda á Wall Street.

Rick Wagoner, forstjóri bílarisans, sagði í viðtali á CNBC-sjónvarpsstöðinni í gærmorgun að góður gangur væri í rekstri fyrirtækisins eftir viðamikla hagræðingu síðastliðin tvö ár sem fól meðal annars í sér sölu á útlánaarmi félagsins, uppsögnum á tugþúsundum starfsmanna og lokun á verksmiðjum.