Kiddi Bigfoot opnar Gauk á Stöng á ný

„Ég er að vinna í plönunum, skoða hverju ég ætla að breyta. Staðurinn opnar svo eftir rúmlega mánuð,“ segir Kristján Jónsson, betur þekktur sem Kiddi Bigfoot, sem keypt hefur rekstur skemmtistaðarins Gauks á Stöng af fasteignafélaginu Eik.

Gaukurinn hefur verið lokaður síðustu mánuðina en það mun breytast innan tíðar. Kiddi segir að hann sé kominn með nokkrar hugmyndir á blað um hvernig stað hann hyggist reka í húsnæði Gauksins. Til að mynda sé mjög ofarlega á lista að þar fái hljómsveitir inni fyrir tónleikahald, en talsvert hefur verið rætt um skort á tónleikastöðum í borginni eftir að Gauknum var lokað í fyrra.

Að svo komnu máli liggur ekki einu sinni fyrir hvað staður Kidda muni heita. „Nafnið Gaukur á Stöng er í eigu þriðja aðila svo það á eftir að skýrast. Það væri auðvitað óskandi að svo færi, þetta er bæði sögufrægt nafn og hús,“ segir Kiddi, sem sjálfur býr yfir mikilli reynslu úr skemmtanalífsbransanum. Hann hefur starfað sem plötusnúður til margra ára á velflestum skemmtistöðum borgarinnar.

Kiddi fær húsnæðið afhent um næstu mánaðarmót. Líklegt er að fyrst um sinn verði einungis notast við efri hæðina. Heimildir Fréttablaðsins herma að ástæða þess sé sú að Framsóknarflokkurinn hafi falast eftir neðri hæðinni fyrir kosningaskrifstofu. „Fólk hefur falast eftir húsnæðinu,“ segir Kiddi leyndardómsfullur.