Þeir Hugi Halldórsson og Auðunn Blöndal segja hins vegar farir sínar ekki sléttar á HM í Þýskalandi og saka íþróttafréttamanninn Adolf Inga Erlingsson um að hafa gengið erinda þýskrar yfirstjórnar í að meina þeim að taka upp efni fyrir stuðningmannaklúbbinn Í blíðu og stríðu.
Hugi gengur svo langt að segja framgöngu Adolfs hreinlega hafa orðið til þess að þeir hafi ekki getað sinnt sínu starfi, þeim hafi verið úthýst og ekki náð að taka upp neitt efni á vef stuðningsmanna eftir leik Íslands og Úkraínu.
Hugi segist hafa vitað að þeir gætu ekki farið inn með myndavél á leik Íslands og Ástralíu þar sem þeir voru ekki með þar til gerða passa.
„Við fengum Adolf því til að smygla henni inn,“ segir Hugi. Þegar leikurinn við Ástralíu á laugardeginum kláraðist náði Hugi í vélina og þeir hófust handa við að taka upp. „Þegar Adolf sá hvað var á seyði kom hann og húðskammaði okkur,“ segir Hugi og heldur því fram að Adolf hafi í kjölfarið tilkynnt þá til hæstráðanda Sportfive sem á sjónvarpsréttinn að mótinu og hann hafi komið í veg fyrir frekari upptökur af þeirra hálfu.
„Yfirmaður Sportfive kom að máli við mig og vildi vita hvort þeir störfuðu á vegum RÚV,“ segir Adolf.„Ég þverneitaði fyrir það enda hefði þetta getað komið okkur ákaflega illa. En ég sýndi þeim síðuna sem strákarnir starfa fyrir. Þar gat hann séð hvað þeir voru að gera og fyrir hvern. Mér finnst þetta auðvitað leiðinlegt fyrir stuðningsmannaklúbbinn en menn geta ekki komið hingað út og hagað sér eins og þeir vilja.“
Fjalar Sigurðsson hjá stuðningsmannaklúbbnum „Í blíðu og stríðu“ viðurkennir að ferð þeirra félaga hafi verið ákveðin með of stuttum fyrirvara og þarna hafi verið gerð ákveðin mistök. Hann segir stuðningsmannafélagið hafa átt í góðu samstarfi við RÚV.
„Við vissum að þeir fóru þangað án réttu pappíranna og að því gæti farið svona,“ segir Fjalar.
