Ólafur leikur best á stóra sviðinu

Ólafur Stefánsson skoraði „aðeins“ þrjú mörk að meðaltali í fimm síðustu undirbúningsleikjum íslenska landsliðsins en síðustu árin hefur hann sparað sig í æfingaleikjunum en spilað frábærlega á stórmótunum.

Ólafur Stefánsson er fyrirliði íslenska landsliðsins í handbolta og algjör lykilmaður í sóknarleik íslenska liðsins. Hann er heimsklassa handboltamaður sem hefur margsannað sig meðal þeirra bestu, bæði með íslenska landsliðinu á stórmótum sem og með félagsliðum sínum Magdeburg og Ciudad Real.

Þeir sem hafa áhyggjur af fáum mörkum Ólafs í undanförum æfingaleikjum geta bara setið rólegir því ef það er einhver maður sem íslenska þjóðin getur treyst á að skili sínu á stóra sviðinu þá er það Ólafur Stefánsson.

Ólafur skaut aðeins 4 langskotum í uppsettum sóknum í leikjunum tveimur gegn Tékkum og stærsta skýringin er örugglega sú að hann er að hlífa öxlinni sem hefur verið að hrjá hann í vetur.

Ólafur hvíldi lítið í leikjunum og þannig verður það örugglega einnig á HM í Þýskalandi þar sem brotthvarf Einars Hólmgeirssonar hefur vissulega rænt hægri vænginn breiddinni. Ólafur skoraði alls 4 mörk utan af velli í Tékkaleikjunum og þar af komu þrjú úr hraðaupphlaupum. Eina mark Ólafs í uppsettri sókn skoraði hann í fyrri hálfleik seinni leiksins þegar Íslendingar voru manni fleiri.

Besta dæmið um að Ólafur nái alltaf sínu besta fram á stórmótum er framganga hans í fyrra. Margir höfðu uppi efasemdir um Ólaf eftir að hann skorað aðeins eitt mark með langskoti í lokaundirbúningsleikjunum liðsins gegn Frökkum og það þótti ekki boða gott að besti maður landsliðsins hefði aðeins skorað 2,6 mörk að meðaltali í fimm æfingaleikjum liðsins.

Eftir fyrsta leikinn, 36-31 sigur á Serbum létti Ólafur áhyggjunum inn á vellinum. Hann átti stórleik skoraði 8 mörk úr 11 skotum þar af 4 þeirra með langskotum. Ólafur endaði mótið með því að skora 8,3 mörk að meðaltali, gefa 7,0 stoðsendingar í leik, nýta 61% skota sinna og tryggja sér sæti í úrvalsliði mótsins.

Kröfurnar og væntingarnar til Ólafs eru alltaf miklar og það er enginn að búast við að hann beri einn uppi sóknarleik íslenska liðsins. Fleiri leikmenn þurfa að taka meiri ábyrgð en íslenska liðið mun þó ekkert hætta að horfa til hæfileika Ólafs í að splundra vörnum mótherjanna með annað hvort hnitmiðuðum skotum eða mögnuðum sendingum.

Eins og allir vita þá sést framlag Ólafs til liðsins ekki síst í öllum stoðsendingunum sem hann gefur. Ólafur gaf 17 stoðsendingar í leikjunum tveimur á móti Tékkum og sex sendingar hans til viðbótar sköpuðu vítaköst. Af þessum 23 lykilsendingum þá voru 14 þeirra inn á línu og þá sást nokkrum sinnum til Ólafs vera búinn að taka upp tívolí-sendingar Sigga Sveins sem er ekki að skemma fyrir flórunni á þeim bænum.

Ólafur sjálfur er maður pælinganna. Það gleyma fáir sjónvarpsviðtalinu við hann eftir leikinn á móti Serbíu á EM í fyrra. Ólafur sagðist þá hafa tekið þá ákvörðun að verða ungur aftur, dreymdi Boris um nóttina og klæddist Valstreyjunni undir landsliðsbúningnum. Íslenska þjóðin myndi vilja óska að Ólafur væri alltaf ungur og til staðar fyrir íslenska landsliðið. Við getum því fagnað því að hann sé enn í fullu fjöri og beðið spennt eftir því hvernig Ólafur Stefánsson umbreytist í besta handboltamann heims þegar að hann stígur á stóra sviðið í Þýskalandi um næstu helgi.