Yfir 1600 hafa greitt atkvæði í prófkjöri Sjálfstæðisflokksins

Alls höfðu 936 kosið í prófkjöri Sjálfstæðisflokksins í Reykjavík fyrir komandi alþingiskosningar nú klukkan fjögur en prókjörið hófst á hádegi. Þegar við er bætt utankjörfundaratkvæðum hafa samtals ríflega 1600 manns greitt atkvæði í prófkjörinu en kosið er í Valhöll í dag og er opið til níu í kvöld.

Prófkjörið heldur svo áfram á morgun klukkan tíu með kosningu á sjö stöðum víðs vegar um borgina en því lýkur klukkan sex annað kvöld. Þá verða fyrstu tölur birtar en reiknað er með að endanleg úrslit liggi fyrir fyrir miðnætti annað kvöld.

NFS verður með kosningavakt á Vísir.is á morgun þar sem nýjar tölur verða birtar jafnóðum og þær berast auk þess sem sent verður beint út frá Valhöll.