Clippers vann grannaslaginn

Los Angeles Clippers lagði granna sína í LA Lakers í leik liðanna á undirbúningstímabilinu í NBA í nótt. Leikurinn var sýndur beint á NBA TV sjónvarpsstöðinni, en alls fóru fram átta leikir í nótt.

Clippers lagði Lakers 91-90. Cuttino Mobley skoraði 26 stig fyrir Clippers og Elton Brand 20, en Andrew Bynum skoraði 15 stig fyrir Lakers.

Golden State lagði New Orleans 112-103. Monta Ellis skoraði 18 stig fyrir Golden State og Linton Johnson og Jannero Pargo skoruðu 17 hvor fyrir New Orleans.

Charlotte tapaði fimmta leik sínum í röð þega liðið lá fyrir Indiana 109-96. Al Harrington skoraði 25 stig fyrir Indiana og Josh Powell 20, en Melvin Ely og Alan Anderson voru með 15 hjá Charlotte.

Orlando lagði Atlanta 109-88. Hedo Turkoglu skoraði 21 stig fyrir Orlando og Dwight Howard skoraði 20 stig og hirti 16 fráköst á 26 mínútum. Marvin Williams skoraði 15 stig fyrir Atlanta.

Chicago Burstaði San Antonio 99-67. Ben Gordon skoraði 19 stig fyrir Chicago en Tim Duncan skoraði 11 stig fyrir San Antonio - sem leyfði 15 leikmönnum að spila yfir 10 mínútur í leiknum.

Dallas vann Milwaukee 88-71. Michael Redd skoraði 14 stig fyrir Milwaukee, en Greg Buckner var með 19 stig fyrir Dallas.

Utah lagði Portland 104-90. Zach Randolph skoraði 17 stig fyrir Portland, en Carlos Boozer skoraði 23 stig fyrir Utah og Andrei Kirilenko skoraði 15 stig, gaf 7 stoðsendingar, hirti 6 fráköst og varði 6 skot í sínum fyrsta leik á undirbúningstímabilinu.

Þá vann Phoenix sigur á Sacramento 111-94. John Salmons skoraði 15 stig og hirti 11 fráköst fyrir Sacramento, en Shawn Marion skoraði 20 stig og hirti 8 fráköst hjá Phoenix, Steve Nash skoraði 17 stig og gaf 13 stoðsendingar - og hitti úr öllum skotum sínum í leiknum. Phoenix skoraði 43 stig og gerði út um leikin í þriðja leikhluta.