Á þriðja tug palestínskra ráðherra og þingmanna í haldi

Spennan eykst enn fyrir botni Miðjarðarhafs. Ísraelskar hersveitir handtóku 20 þingmenn Hamas og 8 ráðherra samtakanna í morgun og í gærkvöld. Skriðdrekar Ísraelshers eru nú í röðum við landamærin á norðurhluta Gaza-svæðisins. Loftárásir Ísraela á Gaza síðan í gær hafa skemmt ýmis mannvirki en hafa ekki enn valdið neinum meiðslum á fólki.

Skriðdrekar Ísraelshers eru nú í röðum við landamærin á norðurhluta Gaza-svæðisins. Heimildarmaður BBC úr röðum Palestínumanna heldur því fram að þeir séu þegar komnir yfir landamærin. Þúsundir landgönguliða fóru hins vegar inn á suðurhluta Gaza í gærkvöldi. Þá fannst lík ísraelsks pilts á Vesturbakkanum í gærkvöld og hafa samtök herskárra Palestínumanna lýst yfir ábyrgð á dauða hans.

Kofi Annan, framkvæmdastjóri Sameinuðu þjóðanna, lýsti í gærkvöld yfir miklum áhyggjum af ástandinu. Aðgerðir Ísraelshers eru tilkomnar til að fá hermann úr þeirra röðum lausan úr haldi Palestínumanna en honum var rænt um síðustu helgi.