Serena Williams ætlar að snúa aftur í sumar

Bandaríska tennisdrottningin Serena Williams hefur sett stefnuna á að snúa aftur til keppni í lok sumars, en hún hefur átt við þrálát hnémeiðsli að stríða síðan á opna ástralska meistaramótinu.

"Læknarnir segja að ég ætti að geta snúið aftur í lok sumars, en ég verð að fara gætilega vegna meiðslanna. Ég er þó ákveðin í að snúa aftur og vil að það sé á hreinu að ég er hvergi nærri hætt. Ég hef aldrei verið jafn spennt að mæta til keppni og einmitt núna," sagði hinn 24 ára gamla Williams, sem tvívegis hefur unnið sigur á Wimbledon mótinu.