Fowler og Crouch í fremstu víglínu

Það eru þeir Robbie Fowler og Peter Crouch sem skipa sóknarlínu Liverpool í stórleik enska boltans í dag en verið var að flauta til leiks á Goodison Park rétt í þessu. Dirk Kuyt er á bekknum en Craig Bellamy er ekki í hópnum.

Rafael Benitez hafði gefið það í skyn fyrir leikinn að Kuyt yrði jafnvel í byrjunarliðinu eftir að hafa spilað mjög vel í sínum fyrsta leik fyrir félagið fyrir tveimur vikum, en þá kom hann inn á sem varamaður í síðari hálfleik.

Þá er Mohamed Sissoko í byrjunarliði Liverpool og er greinilega búinn að ná sér eftir meiðslin sem hafa hrjáð hann síðustu vikur. Fátt kemur á óvart í liðsuppstillingu Everton.