Við bregðumst stuðningsmönnum okkar ekki aftur

Sir Alex Ferguson var ekkert að skafa af því í kvöld þegar hann var spurður um yfirlýst markmið Manchester United í riðlakeppni meistaradeildarinnar, en liðið hafnaði í riðli með Glasgow Celtic, Benfica og FC Kaupmannahöfn.

"Við erum mjög hungraðir í góðan árangur í meistaradeildinni á þessari leiktíð eftir vonbrigðin í fyrra," sagði Ferguson, en United vermdi botnsætið í riðli sínum í fyrra, þó sá riðill hafi almennt verið álitinn nokkuð veikur. Benfica var einmitt liðið sem átti stærstan þátt í að slá enska liðið út í það skiptið.

"Það kemur ekkert annað til greina en að komast áfram í keppninni í ár, við einfaldlega skuldum stuðningsmönnum okkar það og munum ekki bregðast þeim í þetta sinn," sagði Ferguson, sem mætir gömlum lærisveini sínum Gordon Strachan hjá Celtic í riðlinum.

Strachan gagnrýndi Ferguson í ævisögu sinni fyrir nokkru og sagði hann hafa farið illa með sig þegar hann lék undir stjórn Ferguson hjá Manchester United á sínum tíma. Manchester United og Celtic hafa enn ekki mæst í meistaradeildinni, en eru þó búin að spila tvo vináttuleiki á síðustu mánuðum og vann enska liðið þá nokkuð auðveldlega.

"Ég er orðinn hundleiður á þessu United-liði, við erum alltaf að mæta þeim þessa dagana," sagði Gordon Strachan í gamansömum tón þegar hann var spurður út í samkeppnina í riðlinum. "Það er auðvitað ekkert grín að mæta eldheitu liði eins og Manchester United, en þegar maður lítur á hina riðlana í þessari keppni, held ég að við höfum ekkert verið óheppnir með dráttinn. Lið okkar er enn langt frá sínu besta, en vonandi verðum við farnir að spila betur þegar riðlakeppnin hefst," sagði hinn smái en knái Strachan.