Pussycat Dolls of grófar

Stúlknasveitin Pussycat Dolls hefur verið sektuð um fjórtán hundruð pund eða tvö hundruð þúsund krónur af stjórnvöldum í Malasíu. Kisudúkkurnar eru staddar þar í landi á tónleikaferðalagi sínu og voru yfirvöld ekki par hrifin af kynferðislegum tilburðum þeirra en sveitin þykir ansi djörf í framkomu.

Menningarmálaráðherra landsins, Rais Yatim, sagði að tónleikarnir hefðu skartað fáklæddum stúlkum og lostafullu athæfi en slíkt væri ekki við hæfi í Malasíu. Þetta voru mjög ósiðlegir tónleikar, var eftir Yatim í þarlendum fjölmiðlum.

Stjórnvöld í Malasíu hafa lengi haft horn í síðu poppmenningarinnar því árið 2003 var hljómsveitinni Linkin Park bannað að klæðast stuttbuxum á sviði og ári seinna var Mariuh Carey ráðlagt að hafa klæðnað sinn innan siðsamlegra marka.