Féll af vélhjóli og slasaðist á Reykjavíkurvegi

Ökumaður mótorhjóls slasaðist þegar hann féll af hjólinu á Reykjavíkurvegi í Hafnarfirði í gærkvöldi og veltist eftir götunni en hjólið hafnaði mannlaust framan á bíl sem kom úr gagnstæðri átt.

Ökumaður bílsins slapp ómeiddur en ökumaður bifhjólsins brotnaði meðal annars á úlnlið auk þess sem hann lemstraðist allur. Hann var fluttur á slysadeild. Rétt áður hafði annar bifhjólamaður misst stjórn á hjóli sínu í vistgötunni við verslunarmiðstöðina Fjörð og ekið utan í þrjá kyrrstæða bíla. Hann slapp ómeiddur og sem betur fer varð engin gangandi vegfarandi í vegi fyrir honum.