Djöfullinn holdi klæddur

Anna Wintour er mikill áhrifavaldur innan tískuheimsins enda ritstýrir hún einu þekktasta tískuriti í dag, ameríska Vouge. Hún á því greiða leið að þekktustu hönnuðunum og á ekki erfitt með að klæða sig samkvæmt nýjustu straumum og stefnum. Það má segja að hún fái tískuna beint í æð á hverjum degi.

Hún byrjaði í blaðamennsku árið 1970 fyrir breska blaðið Harpers & Queen og hefur síðan þá bæði unnið hjá bæði breska og bandaríska Vogue. Wintour er umdeild kona og hefur hún meðal annars verið kölluð djöfullinn holdi klæddur enda ekki sparsöm á gagnrýni. Wintour er ekkert sérstaklega tilraunakennd í klæðaburði og þekkt fyrir settlegan og fínan stíl. Hún er hrifin af hátískumerkjum á borð við Prada, Dior og Chanel. Wintour er oftar en ekki með svört sólgleraugu á höfði því hún segir að þau skýli henni fyrir ljósi myndavélanna.