Salka í Kjallaranum

Höfundar, þýðendur og aðrir Sölku-liðar fagna skemmtilegu og gjöfulu útgáfuári í Þjóðleikhús-kjallaranum í kvöld kl. 20.

Margir munu lesa upp úr hugverkum sínum og þýðingum en meðal þeirra eru Kristín Ómarsdóttir, Steingrímur J. Sigfússon, Sigurður A. Magnússon, Valgeir Skagfjörð og Súsanna Svavarsdóttir. Sumir upplestrar verða með óhefðbundnu sniði og einnig verður boðið upp á tónlistaratriði. Það er margt spennandi á döfinni hjá Sölku og Hildur Hermóðsdóttir, útgefandi, mun ljóstra upp nokkrum leyndarmálum varðandi næsta ár. Kynnir er Vala Þórsdóttir leikkona.

Verk Sölkuhöfunda og þýðenda munu án efa örva hugmyndaflugið og vekja hlýju og samkennd sem fylgir hlustendum út í vetrarnóttina. Bókaormar og aðrir ormar eru hjartanlega velkomnir í Þjóðleikhúskjallarann meðan húsrúm leyfir.