Sögufélagið með stórvirki í bígerð

Sögufélagið er enn í fullu fjöri. Hélt nýlega aðalfund sinn og er með ýmislegt á prjónunum: hjá félaginu er komið út fjórða ritið í ritröðinni Smárit Sögufélags.

Bókin ber titilinn Barnauppeldisins heilaga skylda. Barnavernd á fyrri hluta 19. aldar og er eftir Hildi Biering sagnfræðing. Og fleira er í pípunum sem tíðindum sætir. Meðal verkefna sem nú er unnið að á vegum félagsins eru Acta yfirréttarins og extralögþinganna. Um er að ræða samstarfsverkefni Sögufélags og Þjóðskjalasafns Íslands og sér Björk Ingimundardóttir um útgáfuna.

Þá hefur félagið hafið undirbúning að útgáfu ritsins Æviskrár íslenskra kvenna, en þar verða æviskrár um 500 kvenna frá upphafi byggðar á Íslandi fram til ársins 2000 skráðar af ýmsum fræðimönnum. Einnig er í undirbúningi bók um innreið nútímans á Íslandi á 19. og 20. öld frá mörgum sjónarhornum. Meðal markmiða er að gera nútímanum skil með aðgengilegum hætti fyrir allt áhugafólk um nútímasögu. Ritstjórar verða Guðmundur Hálfdanarson og Páll Björnsson.

Á næsta ári er væntanlegt fjórða bindið í ritröðinni Rit Sögufélags, en þar er á ferðinni endurskoðuð þýðing á Brevis Commentarius de Islandia eftir Arngrím Jónsson hinn lærða, riti sem olli byltingu í hugmyndum hins menntaða heims um Ísland og eyjarskeggjana. Loks má nefna bók um alla konunga Íslands frá 1264 til 1944 sem vonast er til að komi út 2008.

Sögufélagið er mikilvægur félagsskapur: félagið heldur úti skrifstofu í þremur sambyggðum húsum í Fischersundi þar sem áður var rekstur tengdur gamla bakaríinu. Þar ræður Ragnheiður Þorláksdóttir ríkjum. Félagið heldur úti vefsíðu: www.sogufelag.is, og tímarit þeirra, Saga, er fagnaðarefni hverjum þeim sem hefur áhuga á sögu lands og þjóðar. Er nýtt hefti væntanlegt á næstunni. Stjórn skipa nú Anna Agnarsdóttir forseti, Már Jónsson ritari og Kristrún Halla Helgadóttir gjaldkeri. Meðstjórnendur eru Illugi Gunnarsson og Ragnheiður Kristjánsdóttir.