Þénar meira en Beckham

Tekjur Rússneski tennisspilarinn Maria Sharapova er tekjuhærri en sjálfur David Beckham samkvæmt úttekt bandaríska tímaritsins Sports Illustrated á tekjuhæstu íþróttamönnum heims, annarra en Bandaríkjamanna. Sharapova skaust upp í fjórða sæti listans með 25,4 milljónir bandaríkjadala en Beckham er með 23 milljónir í tekjur á hverju ári.

Langefstur á listanum er ökuþórinn Michael Schumacher með 80 milljónir dollara. Næstur kemur mótorhjólakappinn ítalski Valentino Rossi með 30 milljónir og þá brasilíski snillingurinn Ronaldinho með 29,1 milljón.

Horft er til launatekna, bónusgreiðslna, vinningsfés, auglýsingatekna og fleira í þeim dúr við útreikning tekna íþróttamanna. Tiger Woods er tekjuhæsti íþróttamaður Bandaríkjanna með 97,6 milljónir dala.