Tvö vilja varaformannsætið

Kristján Þór Júlíusson, bæjarstjóri á Akureyri, og Þorgerður Katrín Gunnarsdóttir menntamálaráðherra hafa bæði tilkynnt að þau bjóði sig fram til embættis varaformanns Sjálfstæðisflokksins. Samkvæmt heimildum Fréttablaðsins er hugsanlegt að frambjóðendum í varaformannsembættið eigi enn eftir að fjölga og í þeim efnum er einkum talað um Árna M. Mathiesen, sjávarútvegsráðherra og verðandi fjármálaráðherra, og Bjarna Benediktsson, þingmann og formann allsherjarnefndar. Þorgerður Katrín segir Sjálfstæðisflokkinn standa á tímamótum eftir að Davíð Oddsson tilkynnti brotthvarf sitt úr stjórnmálunum. "Ég býð mig fram vegna þess að ég held að þarna sé tækifæri til að framfylgja því sem við sjálfstæðismenn höfum barist fyrir og allir gera sér grein fyrir að hefur fært fólki fleiri tækifæri og aukna hamingju," segir Þorgerður. Kristján Þór segist ekki vera í framboði sem landsbyggðarmaður heldur fyrst og fremst sem sjálfstæðismaður inn að beini með hag allra sjálfstæðismanna og sjálfstæðiskvenna að leiðarljósi. "Ég vænti þess að landsfundarfulltrúar meti störf mín, þekkingu og reynslu af sveitarstjórnarmálum þegar þeir gera upp hug sinn. Ég er tilbúinn að leggja mitt af mörkum við að móta innra starf flokksins og stýra honum til nýrra sigra á komandi árum," segir Kristján Þór. Árni M. Mathiesen sagðist í gærkvöld ekki hafa gert upp hug sinn enda hafi hann ekki haft tíma til að hugleiða hugsanlegt framboð vegna anna í tengslum við Íslensku sjávarútvegssýninguna sem nú stendur yfir í Kópavogi. Einungis þrettán einstaklingar hafa gegnt embættum formanns og varaformanns Sjálfstæðisflokksins í 76 ára sögu flokksins. Engin kona er þar á meðal og enginn landsbyggðarmaður sem hægt er að skilgreina sem slíkan með tilliti til búsetu á þeim tíma sem viðkomandi var kosinn.