Framlengdi samning sinn til 2009

Steve McClaren hefur framlengt samning sinn við úrvalsdeildarlið Middlesbrough til ársins 2009, en hann hafði verið orðaður nokkuð við Manchester United og enska landsliðið í framtíðinni.

"Þetta félag er á hraðri uppleið, þannig að það var aldrei spurning í mínum huga að vera hér áfram," sagði McClaren, sem færði liðinu eina bikarinn sem það hefur unnið þegar það vann deildarbikarinn árið 2004 og stýrði liðinu í sjöunda sæti úrvalsdeildarinnar í fyrra, sem tryggði Evrópusæti.

"Það er gott að þessi samningur er klár svo við getum farið að einbeita okkur að því að byggja upp gott lið fyrir framhaldið, en við ætlum okkur stóra hluti hérna á næstu árum," sagði McClaren.