Segir útvarpslög gölluð

Sjónvarpsstjóri Skjás eins telur að stuttur texti um gang mála í ensku knattspyrnunni fullnægi þýðingarskyldu útvarpslaga. Hann segir að ef þess verði krafist að íslenskir þulir lýsi öllum leikjum verði það gert en útvarpslögin séu gölluð. Útvarpsréttarnefnd úrskurðaði á dögunum að Skjá einum væri óheimilt að senda út leiki frá ensku knattspyrnunni án þess að nota íslenska þuli. Um helgina hafa verið gerðar tilraunir á stöðinni með útsendingar, meðal annars þannig að leikirnir hafa verið sendir án lýsingar en stuttur texti hefur komið á skjáinn af og til þar sem helstu atriða er getið. Magnús Ragnarsson, sjónvarpsstjóri Skjás eins, telur að með þessu sé þýðingarskyldu fullnægt. Þetta sé hins vegar ekki það besta sem hægt sé að gera fyrir enska boltann og áhorfendur. Að sögn Magnúsar verða íslenskir þulir settir á alla leiki ef útvarpsréttarnefnd telur að þetta fyrirkomulag sé ekki fullnægjandi. Hann segir að það hafi aldrei verið ætlunin að fara á svig við lög en lögin eins og þau eru séu úrelt. Það sé skrýtið að ekki megi útvarpa á ensku í tvo klukkutíma en það sé í lagi að gera það í 24 tíma stanslaust. Magnús segist telja að útvarpsréttarnefnd sé því sammála að með núverandi fyrirkomulagi séu hlutum rétt fyrir komið en lögin séu engu að síður gölluð. Lög séu lög en forsvarsmenn Skjás eins hafi aldrei talið sig vera að brjóta lög heldur að sjónvarpa frá fréttatengdum atburði. Það sé ekki eins og Skjár einn hafi verið að brjóta lög vísvitandi en útvarpsréttarnefnd túlki lögin þröngt og Skjár einn sé röngu megin þeirra. Hilmar Björnsson sjónvarpsstjóri Sýnar, hefur sent Magnúsi bréf þar sem hann býðst til að sýna þá leiki sem Skjár einn treystir sér ekki til að hafa íslenska þuli við. Magnús segir að sér hafi verið skemmt yfir bréfinu. Þetta sé svolítið líkt því að Icelandair færi að bjóðast til að flytja alla farþega Iceland Express. Hann hafi haldið að um brandara væri að ræða en einhverra hluta vegna hafi Hilmar ákveðið að senda bréfið um allan bæ. Magnús segist ekki vita hvað Hilmar ætli sér með þessu en hann telji bréfið ekki svaravert.