Geta tekið á móti stærri skipum

Miklar framkvæmdir standa yfir við höfnina í Bolungarvík en eftir að búið er að dýpka innsiglinguna allverulega á allur loðnuflotinn að geta lagst að höfn í Bolungarvík sem og stærri flutningaskip. Framkvæmdirnar kosta um 54 milljónir. Verið er að taka 80 þúsund rúmmetra af jarðvegi til að dýpka höfnina en framkvæmdinni miðar vel. Hafnarstjórinn hefur ítrekað þurft að vísa frá skipum þar sem höfnin hefur ekki verið nógu djúp en bæjarbúar binda miklar vonir við endurbætur á höfninni. Elías Jónatansson, formaður Hafnarstjórnar, segir að áður hafi dýptin verið sjö metrar bæði í innsiglingu og höfn en innsiglingin verði dýpkuð í níu og hálfan metra yst en níu metra þegar nær dragi og svo verði dýptin 8,7 metrar innan hafnar. Elías segir dýpkunina breyta gífurlega miklu fyrir Bolvíkinga því með henni verði hægt að taka á móti öllum loðnuflota landsins og sömuleiðis stærri flutningaskipum sem kæmu t.d. með frysta iðnaðarrækju. Auk þess gætu olíuflutningaskip sem flytja olíu til hafna landsins lagst að bryggju í Bolungarvík.