Kosningabandalag vinstri flokka?

Einskonar kosningabandalag vinstri flokkanna fyrir næstu alþingiskosningar gæti verið raunhæfur möguleiki að mati forystumanna Samfylkingarinnar og Vinstri - grænna. Formaður Vinstri - grænna segir að vinstri flokkunum í Noregi hafi tekist það sem misheppnaðist hér fyrir kosningarnar 2003.   Steingrímur J. Sigfússon, formaður VG, skrifar á heimasíðu sína í dag að Vinstri - grænir hafi viljað fyrir síðustu alþingiskosningar að stjórnarandstaðan stillti saman strengi sína og byði skýran valkost á móti ríkisstjórninni, þ.e.a.s. velferðarstjórn. Hugmyndin hafi því miður ekki fengið undirtektir og það hafi ekki verið Frjálslyndi flokkurinn sem hafi staðið í vegi fyrir henni. Hann segir menn kannski hafa viljað halda fleiri möguleikum opnum, t.d. samstarfi við Framsóknarflokkinn, sem Steingrímur telur að hafi valdið því að barátta stjórnarandstöðunnar sem heildar hafi fallið nokkuð á lokaspretti kosningabaráttunnar og ríkisstjórnin haldið velli. Vinstri - grænir hafa hug á að endurtaka leikinn og stilla saman velferðarstjórn fyrir kosningarnar 2007 að sögn Steingríms; ekki einungis vegna þess sem gerðist í Noregi heldur vegna þess hversui brýnt það sé orðið að skipta um stjórnarstefnu. Ingibjörg Sólrún Gísladóttir, formaður Samfylkingar, segist ekki útiloka slíkar viðræður þegar nær dregur kosningum; hún sjái ekki að hægt sé að flytja inn slík módel frá útlöndum. Hún hafi hins vegar allt sagt það að ef stjórnarflokkarnir missi þingmeirihluta í næstu kosningum þá sé það skylda stjórnarandstöðunnar að byrja á því að ræða saman. „Hvað varðar kosningabandalag fyrir kosningar þá er auðvitað forsendan fyrir því að slíkt verði að veruleika að menn beri traust hver til annars og gangi svolítið í takt og við eigum bara eftir að sjá hvernig það verður á næsta vetri og næstu sveitastjórnarkosningum,“ segir Ingibjörg.  Guðjón Arrnar Kristjánsson, formaður Frjálslynda flokksins, segir hugmyndina vel koma til greina en þá yrðu menn að vera búnir að ræða málin talsvert og leggja einhvern grunn að því hver væru helstu stefnumál sem hægt væri að ná saman um.