Vekja athygli á skaðsemi reykinga

Hundrað og þrjátíu tannlæknar um allt land ætla eftir hádegi á föstudaginn að bjóða almenningi ókeypis tannskoðun og ráðgjöf, einkum til að vekja athygli á skaðsemi reykinga fyrir tennurnar. Tannlæknar benda á gagnlega umræðu um skaðsemi reykinga, einkum fyrir hjarta- og æðakerfi líkamans, og að tími sé til kominn að vekja athygli á skaðsemi reykinga fyrir tannheilsu. Ýmis áhrif reykinga á líkamann ganga til baka ef fólk hættir að reykja en það á ekki við um tennurnar því þar eru áhrifin varanleg. Reykingar valda samdrætti í háræðum í munni og hindra blóðflæði þar. Það þýir að tannbeinið rýrnar, bil fer að myndast á milli tanna og tannhálsinn að lengjast, en þeim er hætt við skemmdum ef tannholdið ver þá ekki lengur. Ef þetta heldur áfram fara tennurnar að losna og hreinlega detta úr fólki, jafnvel þótt þær séu ekki skemmdar. Það er á þessari vá sem tannlæknarnir ætla sérstaklega að vekja athygli á föstudag í samstarfi við Lýðheilsustöð.