Seðlabankinn á kolrangri leið

Seðlabankinn er á kolrangri leið í vaxtamálum, segir varaformaður fjárlaganefndar Alþingis. Húsnæðiskostnaður er aðal þensluhvatinn í efnahagslífinu, en þáttur stóriðjunnar er miklu minni en búist var við vegna fjölda erlendra starfsmanna. Lagt hefur verið til að fjölga þeim ennfrekar. Fjárlaganefnd Alþingis og efnahags- og viðskiptanefnd héldur sameiginlegan fund í dag um sterka stöðu íslensku krónunnar og þenslu í efnahagslífinu. Fyrir nefndinar voru kallaðir sérfræðingar frá greiningardeildum bankanna, fulltrúar aðila vinnumarkaðarins og svo auðvitað forsvarsmenn Seðlabanka Íslands. Fundurinn stóð í fjóra tíma. Hjá öllum þessum aðilum komu fram áhyggjur af þeirri stöðu sem upp er komin, en ekki voru allir sammála um hvað væri til ráða. Á fundinum kom fram að þáttur stóriðjunnar er mun minni en búist var við. Magnús Stefánsson, formaður fjárlaganefndar Alþingis, segir það liggja fyrir að þensluáhrif stóriðjunnar séu mun minni en reiknað var með og það sem liggur fyrir varðandi breytingar á vísitölunni er þessi mikla þensla, sérstaklega á höfuðborgarsvæðinu, í byggingariðnaðir og hækkað íbúðverð, miklar lánveitingar og hluti af því hefur farið út í einkneyslu sem hefur haft sín áhrif á viðskiptahalla. Á fundinum kom fram það sjónarmið að opna ætti vinnumarkaðinn enn frekar til að vinna gegn þenslu. Sá þáttur sem þyngst vegur er húsnæðisþátturinn og var rætt um hvort taka bæri þann þátt út úr vísitölunni. Pétur H. Blöndal, formaður efnahags- og viðskiptanefndar, segir að mikil umræða hafi verið um það á fundinum og hann sagði að það væri ákveðin stefna meðal þjóða heims að auka samræmingu í vísitölun og taka þá húsnæðiskostnaðinn inn. Hann benti á að Íslendingar hefðu verið framarlega í flokki við mat á húsnæðiskostnaði en hann sagði jafnframt að þetta væri erfitt. Einar Oddur Kristjánsson, varaformaður fjárlaganefndar er svartsýnn á útlitið og telur seðlabankann á rangri braut í vaxtamálum og hann ætti að gera eins til tveggja ára áætlun um það hvernig bankinn ætlar að koma sér út úr hávöxtunum því þetta gangi ekki upp. Hann segir það vera mun raunhæfara fyrir Seðlabankann að búa til 12, 18 eða 24 mánaða áætlun um hvernig hann ætlar að koma sér út úr þessum hávöxtum og tilkynna það þannig að aðilar vinnumarkaðarins og fjárfestar geti séð til langtíma hvert Seðlabankinn stefnir og þannig geti þeir reynt að koma sér út úr þessari miklu klemmu með mjög svo háa vexti.