Osló og Kaupmannahöfn dýrastar

Osló og Kaupmannahöfn eru þær borgir heims þar sem dýrast er að búa, að frátalinni húsnæðisleigu. Þetta er meðal niðurstaðna könnunar svissneska bankans UBS á verðlagi í 71 borg í öllum heimsálfum. Sé leigukostnaður íbúðarhúsnæðis talinn með færist London efst á listann. Reykjavík er ekki með í könnuninni. Fall Bandaríkjadals hefur valdið því að bandarískar borgir færast talsvert niður á listanum frá því UBS-bankinn í Zürich gerði síðast slíka könnun fyrir tveimur árum. Að jafnaði er verðlag nú 10 prósent lægra í bandarískum en vestur-evrópskum borgum. Til grundvallar útreikningnum liggja upplýsingar um verð á 115 tegundum vöru og þjónustu og 104 viðmiðunartölur um laun, launatengd gjöld og unnar vinnustundir í 13 atvinnugreinum. Þær borgir þar sem ódýrast er að búa eru eftir sem áður indverska risaborgin Mumbai (Bombay), Karachi í Pakistan, argentínska höfuðborgin Buenos Aires og Austur-Evrópuborgirnar Kiev, Búkarest og Sofía.